มูเล หลิทฺทิํ ขนฺเธ จ, มญฺเชฏฺฐ ตุงฺคหารเก;
อลฺลิํ นีลญฺจ ปตฺเตสุ, ตเจ โลทฺทญฺจ กณฺฑุลํ;
กุสุมฺภํ กิํสุกํ ปุปฺเผ, สพฺพํ ลพฺภํ วิวชฺชิยาติฯ
5. ปตฺตนิทฺเทโส
ปตฺโต จาติ –
[60]
อโยปตฺโต ภูมิปตฺโต, ชาติยา กปฺปิยา ทุเว;
อุกฺกฏฺโฐ มชฺฌิโม เจว, โอมโก จ ปมาณโตฯ
[61]
อุกฺกฏฺโฐ มคเธ นาฬิ-ทฺวยตณฺฑุลสาธิตํ;
คณฺหาติ โอทนํ สูปํ, พฺยญฺชนญฺจ ตทูปิยํฯ
[62]
มชฺฌิโม ตสฺสุปฑฺโฒว, ตโตปฑฺโฒว โอมโก;
อุกฺกฏฺฐโต จ อุกฺกฏฺโฐ, อปตฺโต โอมโกมโกฯ
[63]
อติเรกปตฺโต ธาเรยฺโย, ทสาหปรมํ สโก;
กปฺโป นิสฺสคฺคิโย โหติ, ตสฺมิํ กาเลตินามิเตฯ
[64]
อจฺเฉททานคาเหหิ, วิพฺภมา มรณุทฺธฏา;
ลิงฺคสิกฺขาหิ ฉิทฺเทน, ปตฺตาธิฏฺฐานมุชฺฌติฯ
[65]
ปตฺตํ น ปฏิสาเมยฺย, โสทกํ น จ โอตเป;
อุณฺเห น นิทเห ภุมฺยา, น ฐเป โน จ ลคฺคเยฯ
[66]
มิฑฺฒนฺเต ปริภณฺฑนฺเต, องฺเก วา อาตปตฺตเก;
ปาเทสุ มญฺจปีเฐ วา, ฐเปตุํ น จ กปฺปติฯ
[67]
น นีหเรยฺย อุจฺฉิฏฺโฐ-ทกญฺจ จลกฏฺฐิกํ;
ปตฺเตน ปตฺตหตฺโถ วา, กวาฏํ น ปณามเยฯ
[68]
ภูมิอาธารเก ทารุทณฺฑาธาเร สุสชฺชิเต;
ทุเว ปตฺเต ฐเปยฺเยกํ, นิกฺกุชฺชิตฺวาน ภูมิยํฯ
[69]
ทารุรูปิยโสวณฺณ-มณิเวฬุริยามยา ;
กํสกาจติปุสีสผลิกาตมฺพโลหชาฯ
[70]
ฉวสีสมโย จาปิ, ฆฏีตุมฺพกฏาหชา;
ปตฺตา อกปฺปิยา สพฺเพ, วุตฺตา ทุกฺกฏวตฺถุกาติฯ
6. ถาลกนิทฺเทโส
ถาลกา จาติ –
[71]
กปฺปิยา ถาลกา ติสฺโส, ตมฺพาโยมตฺติกามยา;
ทารุโสวณฺณรชตมณิเวฬุริยามยาฯ
[72]
อกปฺปา ผลิกากาจกํสชา คิหิสนฺตกา;
สงฺฆิกา กปฺปิยา ตุมฺพฆฏิชา ตาวกาลิกาติฯ
7. ปวารณานิทฺเทโส
ปวารณาติ –
[73]
เยนีริยาปเถนายํ, ภุญฺชมาโน ปวาริโต;
ตโต อญฺเญน ภุญฺเชยฺย, ปาจิตฺตินติริตฺตกํฯ
[74]
อสนํ โภชนญฺเจว, อภิหาโร สมีปตา;
กายวาจาปฏิกฺเขโป, ปญฺจองฺคา ปวารณาฯ
[75]
โอทโน สตฺตุ กุมฺมาโส, มจฺโฉ มํสญฺจ โภชนํ;
สาลิ วีหิ ยโว กงฺคุ, กุทฺรูสวรโคธุมา;
สตฺตนฺนเมสํ ธญฺญานํ, โอทโน โภชฺชยาคุ จฯ
[76]
สามากาทิติณํ กุทฺรูสเก วรกโจรโก;
วรเก สาลิยญฺเจว, นีวาโร สงฺคหํ คโตฯ
[77]
ภฏฺฐธญฺญมโย สตฺตุ, กุมฺมาโส ยวสมฺภโว;
มํโส จ กปฺปิโย วุตฺโต, มจฺโฉ อุทกสมฺภโวฯ
[78]